新興市場貨幣危機繼續發酵，繼土耳其里拉、阿根廷披索後，印度盧比及印尼盾亦分別創下歷史低位及20年低位。港股今日亦挫逾700點。騰祺基金管理投資管理董事沈慶洪認為，暫時未看到會成97金融風暴翻版，「新興市場資金係流走緊，個市會繼續震盪，但暫時未睇到會成為金融風暴。」

沈慶洪解釋指，要惡化成金融風暴，首要是有地域關連性：「而家土耳其、阿根廷有問題，未去到一個地域性，呢兩個國家經濟冇互相關連，印尼而家開始有問題，但如果燒到泰國，韓國咁，咁先有可能出現金融風暴。」

他續指，目前發生的貨幣危機，甚至貿易戰，都是看到的問題，並非突發性及不能預測：「好似歐債危機，財政有問題嘅國家，拎出嚟講，歐盟同歐央行咪去諗方法救。當年雷曼爆煲係無先兆，先至引發風暴，而家好多問題大家都睇到，好多人已經避開咗。」但他強調並非百分百冇金融風暴，只是暫時仍未惡化。

大市方面，他認為目前恒指會下試26,800點：「目前見步行步，個市反彈少少，好多人會減磅，所以唔好買嘢住。貿易戰好可能影響埋美國經濟，大家都估今年12月未必有條件再加息，如果唔加又會影響全球資金流向。」

全球樓行 Dream House零距離
https://hk.feature.appledaily.com/overseasproperty