李寧賣「李寧」（2331），由昔日嘅體操王子搖身一變成為地產王子，身手之非凡令市場為之眼前一亮！話晒李寧同「李寧」係國家一級運動員同運動用品品牌，一舉一動都會畀人盯到實；不過，有趣嘅係李寧無論搞親乜嘢，似乎都係畀人鬧多過畀人讚，唔計呢鋪以大批新股空手入白刃養大快意節能（8032），畀人狂插不務正業，原來公司logo同口號都畀人鬧餐飽！

畀人鬧多過讚

好似中期業績報告封面嗰句口號「讓改變發生」，英文係「Makethe　change」，「李寧」嗰邊早前解讀係體現由敢想到敢為嘅進化，鼓勵每個人敢於求變、勇於突破！口痕友話，快意節能呢單嘢，咪中正呢個意思囉；之不過嗰三個英文字，硬係令人覺得佢抄人，抄邊個？咪奧巴馬嘅Change囉！
咁新口號有雷同，舊口號「Everythingispossible」亦不遑多讓，一直畀人話同Adidas嘅「Nothingisimpossible」兩生花。至於個公司logo，舊嗰個畀人詬病同NIKE似樣，而經過品牌重塑新嗰個呢？Sorry，華華同意大多數人嘅講法─真係睇唔到點樣「以更具有國際觀感的設計語言對原標識的經典元素進行了現代化表達」囉！
話時話，「李寧」由logo到口號都同人哋「如有雷同」，唔知李寧有無諗過將呢嗰局面Makeachange呢?

李華華
mailto:[email protected]