Prada尖沙嘴專門店重新開幕，請嚟宋慧喬做開幕嘅嘉賓，可能天氣好熱，佢面紅紅咁出場，喬妹仲大賣口乖，話好鍾意香港呢個城市，又好鍾意呢個品牌。

喬妹之前就同埋啲同事去咗韓國濟洲旅行，玩得好開心仲想去多啲唔同嘅地方，例如紐約、巴黎、意大利等。問到喬妹想唔想去有陽光海灘嘅地方着下泳衣咁，佢話：「我好鍾意海邊，但怕水，所以游水都會去泳池。」之後問到鍾唔鍾意着泳衣，翻譯就話唔答呢條問題。

最近喬妹被選做「亞洲十大美人」，喬妹就好開心，佢話：「依家都接觸好多嘢，都有好多人係好靚，有啲後生嘅都好值得大家關注。」講到青雲都想搵佢合作，喬妹就話未見到佢，至於好朋友梁朝偉，喬妹就指今次冇機會見到佢。