全國人大常委會建議在10月會議上，提請列入《基本法》附件三的《國歌法》，昨日在全國人大常委會通過，規定於今年10月1日起正式實施，新法明確「侮辱國歌」的法律責任，可追究刑事責任，同時提出要在中小學應將國歌作為愛國主義教育的重要內容，鼓勵唱國歌。

律政司長袁國強其後表示，會透過本地立法方式，在港實施。

早前全國人大常委會提請審議將《國歌法》列入港、澳《基本法》附件三，咁如果真如國強袁先生咁講，在港生效，咁會有乜嘢「魔鬼細節」可能出現？

1.在公共場合，惡意修改國歌歌詞或者故意以歪曲、貶損方式奏唱國歌，損害國歌莊嚴形象的人，都可被公安機關拘留15日以下。
2.不得在私人喪事活動等不適宜的場合奏唱及播放國歌，違例將被公安機關處最多15日行政拘留。
3.不得用於廣告及公共場所等背景音樂，違例將被公安機關處最多15日行政拘留。
4.惡搞國歌國詞、噓國歌都可能犯法
5.在奏唱國歌時，在場人員應當肅立；若做出不尊重的行為，也可能違法。

咪住…香港冇「公安機關行政拘留」制度喎…同埋，如果有人奏國歌時，木無表情，或者唱到走晒音，咁，算唔算犯法？

咁六點半新聞前一聽到國歌，每個人喺屋企係咪都要即刻企起身肅立？

仲有喎，李克勤首《球迷奇遇記》，「起來起來起來」，係咪又損害國歌莊嚴形象？黎明首《全日愛》，雷頌德講明「我係擺到明玩國歌嘅！」咁係咪執法先？另一個問題就係，條例喺香港有冇追溯權？豁免權準則為何？

本港教育局網頁都馬上做嘢啦，率先大幅刪減國歌《義勇軍進行曲》的創作背景，亦未有提及國歌填詞人田漢後來在文革中被批鬥至死。

愛國下場，就是下獄，且受屈辱致死，有指田漢受批鬥期間，更被强逼飲自己的尿；然而，令人想不到的是，當人大常委會通過國歌法後，田漢旅居日本的侄女田偉，卻稱對立法非常感動。

愛國要怎樣愛？03年開始喺大陸投資，06年起擔任江西省政協嘅鄺美雲，今日為愛國「港人講地」拍咗條片，佢教大家照鏡，又提醒大家要感恩：「尊重自己係一個中國人，你要感恩自己呢樣嘢。」支持《國歌法》本地立法。

鄺美雲話：「我哋真係一個中國人，你自己國歌都唔唱好，你想唱咩國歌呢？你唱人哋嗰隻囉，係唔係先？」

「你尊重國家，等於尊重你自己；你唔尊重你自己嘅國歌，即係唔尊重你自己。我諗有啲人佢係鍾意反叛，佢或者覺得，咁樣係幾有型，總之我就係同你哋唔一樣。但都係要再講一次，點樣唔一樣？你照下鏡，你真係一個中國人。」

「你要知道自己嘅根本，你係中國人，你要唱國歌，點解你要做一啲唔尊重，或者好特別嘅行為去抗議呢？我唔知呢啲係乜嘢心態。不過我想話俾大家聽，尊重自己嘅身份，尊重自己係一個中國人，你要感恩自己呢樣嘢。」

參考文章：
【《國歌法》殺到】將審議列入《基本法》附件三 港人要小心啲乜？
http://bit.ly/2gxXlQd

【開學日】《國歌法》未殺到 教育局網站忽刪國歌簡介
http://bit.ly/2exrlLv