「小丑女」澳洲女星瑪歌羅比（Margot Robbie）上月於家鄉結婚後，已經回到美國開工拍新片《I, Tonya》，而佢同老公Tom Ackerley都係新片監製。
瑪歌於電影中扮演90年代美國奧運花式溜冰選手Tonya Harding，瑪歌上周五於亞特蘭大片場現身，佢臉腫腫有雙下巴之餘，身形仲大咗個碼，同平時嘅靚女外表唔同咗好多。原來瑪歌為咗角色犧牲靚樣，化咗特技裝及穿上特製服裝扮肥。瑪歌亦為咗電影特別去學花式溜冰，下咗唔少苦功。

呢位溜冰選手Tonya Harding於1994年奧運前，其丈夫請黑幫去打斷Tonya嘅對手Nancy Kerrigan隻腳，令Nancy唔可以出賽。不過最後Nancy逃過一劫，只係隻腳瘀咗可以出賽，最後仲拎埋銀牌，而Tonya只得第8。事件被揭發後，Tonya丈夫被判入獄，而Tonya終身停賽。