當年今日
關於我們

【新東補選】選民稱投票是唯一可做 梁天琦支持者:畀阿Bill贏好唔抵

蘋果日報 2018/03/11 13:17

補選立會補選

【新增訪問】
新東建制派候選人鄧家彪早上11時半於大圍站舉行告急大會,獲黨友麥美娟、民建聯葛珮帆及陳恒鑌、新民黨容海恩、漁農界何俊賢、工程界盧偉國、以及前保安局局長黎棟國等人站台,團隊以大量旗海及大型音響發言,完全蓋過在附近拉票的范國威助選團隊。
黎棟國發言時指,立法會需要做實事,講真話,「為市民發聲,唔要拉布,拖住建設嘅後腿」。唯他發言短促突然完結,令助選團反應不及叫喊口號。站台人士分別以反拉布、支持香港建設力量等為鄧助選。
鄧家彪則指,立法會現時充斥漫罵、對立、拉布等,令選民失去投票意欲,要扭轉困局就要投票改變,他指現時選情好危急,在新東特別困難,如市民不投票,可以扭轉拉布的機會就細好多,令立法會不健康的風氣蔓延。他以新東「唯一建設力量嘅代表」自稱,懇請全港市民投票。
被問到早早打告急牌是否對新東選區欠信心,他表示,新東一向對他們「建設力量」是艱難的,自己不會否認,除了爭取固有支持者,最肉緊還有一班求變的市民,他希望他們用選票展示不滿立法會拉布的力量。
鄧家彪在造勢會上表示,昨晚凌晨4時半,位於林村鄉公所帳蓬及旗幡被破壞,發現的助選團已當場報警及拍照,並即時拘捕破壞的新民主同盟區議員周炫瑋及2個青年,事件擾釀2小時。他要求警方從速處理,又強烈譴責有關行為。幫忙站台的前立會主席曾鈺成直斥愚蠢無恥行為,形容對手無所不用其極,呼籲選民用手上選票發聲。
對於周炫瑋被指控破壞鄧家彪的選舉物資,范國威呼籲候選人要擺事實、講道理,他解釋,周炫瑋只是誤以為有關的帳篷是新同盟的物資,並將有機會阻礙路人的帳篷搬走,強調不是刑事毀壞,斥對方是抹黑,潑污水。
警方發言人回覆《蘋果》查詢指,3月11日凌晨3時50分接獲一男子報案,指太和邨亨和樓對開有一個帳篷被毀,警方接報到場,經初步調查,暫列作「刑事毀壞」,交大埔警區刑事調查隊第七隊跟進,未有任何人被捕。
本身是民主派支持者的朱女士,今早10時許已經在乙明邨的票站投票。朱女士透露自己投了給新同盟范國威,她形容自己是民主派忠實支持者,斥政府「好唔啱」,DQ民選議員,她要投票讓民主派重回議會,拒絕建制派、政府和中共政權箝制,破壞一國兩制。她會呼籲民主派支持者、自己的朋友、大廈的鄰居支持民主派候選人。
范國威初選的對手,前中大學生會會長張秀賢今日亦與范國威到多區的街站拉票。張秀賢指本土派的票源流向難以估計,他明白本土派支持者對范有成見,對於他們投白票或者不投票都表示尊重,但呼籲他們不要支持建制,以免建制坐享漁人之利。
新東議席原屬青年新政梁頌恆代替不能參選的梁天琦出征,唯梁頌恆被DQ,范國威能否盡吸本土派支持者票源成疑。選民黃先生指自己上屆支持陳雲,今次因為想范國威輸故投票予鄧家彪,「我唔係諗佢(范國威)代唔代表到梁頌恆,而係佢代唔代表到新界東人嘅本土利益,佢唔得,咪唔投佢」。被問到有何人可以代表到,他認為即使現時梁天琦等人也不能代表本土利益,因為欠缺實務,而其他候選人「癲癲地,點投畀佢哋」,故最終選擇投鄧家彪。
不過上屆票投梁頌恆的詹先生本身是梁天琦支持者,今次補選亦有掙扎:「我都考慮過兩邊(因素),一邊為咗反DQ,另一邊係呢一票唔值得投,但要履行個公民責任,投票有權梗係要投,唔可以話邊個唔鍾意邊個,所以唔出嚟投」。他指「依家成件事講緊DQ,每日返工放工見到阿彪鋪天蓋地嘅宣傳,畀佢贏咗好唔抵喎」。
沙田選民劉小姐指,今次要盡一份力投票,「其實都要反映番,就算議員比DQ,都有市民係支持緊佢哋」。她指自己支持非建制派,雖然有時言行舉止太過火,但不應該因此被DQ。
歷年來都有投票的李太不願透露立場,但認為是公民責任驅使她來投票,「公民責任嚟,都係要投嘅,都要行動去選嗰一票,無論你咩票都好,都係要支持,如果唔係會冇意思,因為你始終有個立法會,你希望自己想選嘅人入去,選唔選到另一件事啦,都係應該行使呢一票」。
另一名黃先生指自己投給「冇咁激冇咁嘈嗰啲」候選人,「投咗盡咗少少力,(政府DQ事件看法?)政府又係幫唔落,唔知幫得邊個。(DQ)過激囉,但香港唔適宜咁激,你知祖家係咩人,過激盞死,即係唔好太聽話,又唔好駁嘴,你要睇老細係咩人,宜家大陸搵到錢,就收心養性,(香港都要收心養性?)暫時要㗎啦,一回歸之後就要,(搵到錢但無自由?)唔會嘅。」
不上鏡的梁小姐是最近一兩屆選舉才開始投票,上次立法會有想過投梁頌恆,但最終配票策略下覺得他夠票,故投了另一人,她亦認為范國威未必可以滿足到本地派支持者的意願,只是基於無力感,投票是唯一可以做的事。
將軍澳居民余小姐指兩年前投票予梁天琦,她指今次轉投民主派范國威,「因為香港人應該要攞返被DQ嘅四席,唔滿意政府所做,點都會投俾民主派,我唔喜歡政府咁嘅做法,所以要反映,有機會就攞返席位」,「唔忿氣但都冇辦法,強權當道,范國威唔係我心目中最佳人選,地區工作都有10年,好多承諾佢都未做到,係會失望嘅,但我明白政府唔喜歡民主派所以好多嘢都做唔到,不過今次最主要希望攞返DQ嗰四席」。
余小姐指自己不是含淚投票予范國威,但不算心目中最佳人選,「我唔係支持本土派,但係我支持想爭取民主嘅年輕人,係應該留俾年輕一代」,「我唔係支持港獨或者本土,而係好明白香港年輕人應該擁有發聲嘅空間,我覺得年輕人如果冇希望嘅話應該有得發聲,社會係年輕一代,佢哋應該擁有空間」,她又指不認為梁天琦是暴徒,認為梁天琦只是為未來爭取自己的權益,她會堅定堅持這一批年輕人。
將軍澳居民張小姐同樣本身支持梁天琦,但因今次新界東沒有其他理想人選,最後票投范國威,「我本身支持民主派,無其他人可以揀,又見民主派已經努力協調,范國威係今次唯一人選同最理想人選」,她指自己並非本土派支持者而支持梁天琦,而是會傾向支持民主派的年輕人,「不過轉投范國威都唔係含淚,而是我真心支持香港民主,只要係民主派我都會支持,希望民主進程有希望」,不過他指如果有得選擇的話,不會投范國威,「姚松炎如果選新界東我會投佢」。
立會補選新聞,《蘋果》一網睇晒
http://bit.ly/appledaily311
empty
易仰民攝
empty
易仰民攝
empty
王心義攝
empty
易仰民攝