早前韓國方面傳來消息，話曾製作《沒關係，這是愛情》、《那年冬天風在吹》等多套人氣韓劇嘅導演金奎泰決定翻拍內地熱爆劇集《步步驚心》，雖然仍在籌備階段，但係呢個消息喺內地同韓國方面都惹嚟熱烈討論。

而今日更傳出消息話荷李活製片公司環球影業宣佈將進軍韓國電視市場，並會投資韓版《步步驚心》改編成嘅電視劇《月亮的戀人》（暫名）。據消息指韓版《步步驚心》將由美國環球影業公司投資約50%，目前韓國製作方同美國環球影業公司亦已進行會議並簽訂合約。

《月亮的戀人》預算製作費約150億韓圜（約1億3千1百萬港元），因為最終合約簽訂預計需要到年底才完成，所以劇集製作就要到明年初先開始拍攝。據知環球影業決定投資韓劇，主要係因為韓流喺世界各地都有好大影響力，加上《步步驚心》喺內地人氣高企，就連喺韓國亦曾評為韓國播放嘅最佳海外電視劇第一名。

今次中韓美三方面攜手合作，亦會採用先製作後播放嘅方式，相關人士表示：「內地劇先製作後播放嘅方式影響咗韓國嘅電視劇創作環境。隨着海外投資搶佔內地市場，呢種趨勢會更加明顯。海外投資通過進軍韓劇市場作為進軍亞洲嘅跳板，相信《月亮的戀人》會取得成功。」