愈早學愈着數
一般人對滾軸溜冰都有唔少疑問,𠵱家就等家寶為你哋解答:
Q :玩滾軸溜冰係唔係成日受傷?
A :其實參加每項運動都有機會受傷,只要之前做足安全措施,就會減低嚴重受傷嘅機會。
千祈唔好喺行人路玩
Q :喺香港邊度有得玩滾軸溜冰?
A :通常大型公園好似維園、摩士公園、九龍仔公園都有公共溜冰場,不過行人路就太危險,所以千祈唔好試。
Q :滾軸溜冰應該幾時開始學?
A :如果花式滾軸溜冰,最好係十歲之前開始學,速度滾軸溜冰就講求體能多啲,年紀大啲開始學都冇問題。
Q :花式滾軸溜冰難唔難學?
A :花式滾軸溜冰會分布、銅、銀、金章等不同難度證書課程,初學者最好由布章學起,通常學一個月已經可以掌握基本溜冰技巧,一年可以完成布章證書課程。
吳家寶小檔案
年齡:20歲 身高:5呎2吋
體重:108磅
就讀學校:港大社會科學系一年級
個人榮譽:02年全國滾軸溜冰精英賽女子青年組亞軍、02年香港滾軸溜冰公開賽女子組冠軍
圖:梁祖彝
文:盧漢傑
鳴謝香港業餘滾軸溜冰總會協助