【新增影片】《星戰》外傳《俠盜一號：星球大戰外傳》（Rogue One: A Star Wars Story）周四上映，故事時空設定喺1977年首部《星球大戰：新的希望》（第四部曲）之前，交代革命軍點樣得到死星藍圖，之後交到莉亞公主手中。一行六人嘅「俠盜一號」會冒死潛入帝國軍總部偷藍圖，其中一個就係甄子丹飾演嘅Chirrut Îmwe（智刃嚴），角色戲份都幾重，不過宇宙最強竟然諗過拒絕！

記者：黃芷蔚

參演《星戰》一向係好多演員夢想，子丹話當初導演加利安愛德華斯（Gareth Edwards） 主動搵自己係幾受寵若驚，不過佢都諗咗幾個月先應承，「一開始我係冇諗過拍，因為要離開屋企人去倫敦五個月，後嚟我問仔女：『你鍾意爸爸做葉問抑或星戰角色？』佢哋就話：『梗係星戰啦！』咁我就必須要拍，一定要拍一部。」

唔單止咁，一個揮低十個白兵嘅俠盜智刃嚴之所以會失明，原來係子丹諗出嚟，「本身個角色已經好打得，我同佢哋討論劇本時，話如果佢係盲就更加好玩，佢哋話：『幾好喎！』」佢透露角色係冇原力亦唔會拎光劍，不過拍第一場戲嗰陣，佢就提議加支盲公竹做武器，導演又OK。子丹講笑話：「其實我應該收啲版權費！」而戲中係佢生死之交嘅姜文唔小心爆過智刃嚴會死，子丹當日就好口密，反問姜文係咪飲大咗。