勒索X高官案審結，女主角罪成入冊，男主角亦恢復正常生活，大家最關心X高官是誰，官場中人都好八卦，竊竊私語X高官呢單嘢可能仲有下文。有個同X高官咁高咁大嘅高官向八方爆料，最新消息係X高官仕途行人止步，本來佢見完board篤定升官，但𠵱家政府撤銷佢升職，打回原形。
尋歡惹來一筆糊塗風流賬，X高官人財兩失，八方唔知佢醉卧溫柔鄉時，有冇諗過越軌行為嘅代價咁大，連本帶利前途一鋪過賠上。歡場冇真愛，有人話X高官衰在同許榮嚟真，短炒變長揸，想止蝕時先知甩唔到身。X高官斬唔到倉搞到一身蟻，可能有迹可尋，據知佢早年樓市高峯時入市，𠵱家最少有兩個物業揸手，一個係藍籌屋苑單位，一個係花園洋房，總值逾千萬元，不過同佢感情生活一樣，跌市時佢冇壯士斷臂止蝕離場，估計𠵱家仍未返到家鄉。

X高官「前途似咁」，有兩個人卻坐享其成。X高官升職拉倒，八方收到風政府已經成功另覓升職人選，呢位仁兄/仁姐今勻真係冷手執個熱煎堆；而X高官個上司因為要處理交接事宜，據知亦要坐多一會遲啲退休，無端端多𢭃幾十萬蚊人工先咬長糧。
同X高官有交情嘅官員同八方講，其實X高官係部門實力分子，做嘢好掂工作能力絕對冇問題，否則都唔會頻頻紮職升完又升，呢次事件雖然對佢打擊好大，但佢盡量控制情緒，案件審完後即刻結束休假恢復正常工作，一切如常當冇事發生過，表現專業。

不過另一個官員卻唔係咁睇，佢話X高官所屬部門向來論資排輩好難升職，一般人做十幾年先升一級，X高官卻好似坐白金升降機咁頻頻升官，今次因女色導致升職「墮馬」係咎由自取。佢認為要公開X高官身份，因為官員工作涉及公眾利益，私生活應該檢點，如果有不法分子睇中官員貪圖女色而行賄，甚至捉佢「黃腳雞」威脅，要佢喺公務上做手腳，後果可大可小，最後受害嘅可能係奉公守法嘅小市民。