陳美齡同麥明詩媽咪麥何小娟有咩共通點？

一．喺外國高級學府修讀教育
二．仔女都讀外國名牌大學
三．都有出書分享教育子女心得
四．曾經同教育局長一職好接近

介紹番，陳美齡喺美國史丹福大學讀教育學博士，三個仔先後考入史丹福大學，然後上年出書《50個教育法，我把三個兒子送入史丹福》，今年再接再勵出埋《40個教育改革提案把快樂帶回給香港學生》。

而麥太麥何小娟呢，就係兒科註冊職業治療師，又喺澳洲墨爾本大學讀教育碩士，上年都出咗本書《我的女兒麥明詩－一張白紙到10優的培養經歷》講點教女。

早幾個月，林鄭當選特首，就傳過會搵陳美齡做教育局長，雖然佢喺訪問中親口否認，但空穴來風，未必無因㗎，因為陳美齡真係同林鄭見過面，仲討論過教育問題。

當時麥明詩知道陳美齡可能做到局長，就想推薦媽咪「角逐」，又話自己真心支持媽咪，但麥太ready未呢？麥明詩就話要問番媽咪……

最終結果係……唔使爭，打和。新班子嘅教育局長由副局長楊潤雄升任，而副局長呢個位，交咗俾教聯會前副主席，被指係「紅底」嘅蔡若蓮。

不過呢個位認真唔好坐，新學年未開始，就爆出一單「興德之亂」，有小學被質疑造影子學生，事件擾攘十幾日，到上星期先成功罷免校長陳章萍，咁嘅燙手山芋，陳美齡同麥何小娟都算少咗個煩惱啦。