美國總統投票前夕，中國前副總理兼外長錢其琛突然說三道四，公然干預美國內政，英文中國日報發表錢其琛專文，大罵布殊用「冷戰思維」行外交政策。本港左報登載，證實係白頭錢「星期一在大選前夕」撰文，重話「錢其琛罕有地發表這番評論，打破了中國不品評美國總統候選人慣例」。
估唔到時隔一日，中國即時縮沙，唔知係咪自知美國得罪唔起，發言人章啟月公開補鑊，竟然話錢某文章，不代表中國官方立場，話唔知邊個授權中國日報，刊登錢某文章，又表示錢某只不過喺好耐之前在中央黨校講話內部評論美國政府而已，並非係中國表態反對布殊連任。
章啟月向布殊認錯，無疑係明智之舉。美國選總統，影響全球利益，除非極有份量嘅盟國，例如日本，同埋實力強國如俄羅斯藝高人膽大，先至夠薑由首相小泉純一郎及總統普京出面，唔怕話到明，公開買重注，表示擁護布殊連任。
日俄兩國元首撐布殊，就算買錯咗，克里上台，都唔敢畀面色過小泉純一郎同普京兩個睇。鄧小平同毛澤東話頭，中國永遠屬於第三世界，日俄兩國係民主自由國家，中國就行第三世界獨裁制，故此長期受到美國歧視，學人口多多亂噏，若然膽敢踩布殊洩憤，萬一俾布殊贏咗，人哋笑笑口暗施報復，搞到油價七十蚊美金一桶，或者彈個眼色畀阿扁，畀膽佢講兩句「台灣主權已事實獨立」，再派兩隻戰艦嚟香港，喝令阿董同佢隻艦加油添水，放美國水兵上岸搵北姑搞嘢消費，陳水扁隔住個海嘴藐藐，中國又唔敢出兵，手尾就好長嘞。