廠迷餐廳｜創業遇社運武肺打擊照開分店 死忠盼同阿仙奴一齊踢逆境波
蘋果日報 2020/12/27 13:58
阿仙奴lockeroom dining武漢肺炎MT_英超陳嘉健阿仙奴餐廳雲格
擁有廿年西廚經驗的陳嘉健（Eddie）去年放棄酒店行政總廚一職，開設香港少數以足球為主題的西餐廳，店內擺滿愛隊阿仙奴的簽名球衣與擺設。雖過去一年半經歷抗爭運動及武漢肺炎疫情，開業至今未曾順風順水，但仍無阻他逆市擴充開分店，「希望香港同阿仙奴一樣，可以雨後見彩虹。」
記者、攝影：麥卓溢 部份相片由受訪者提供
當年的英格蘭聯賽不如今時今日般百花齊放，幾乎所有隊伍都秉承英國足球「高Q大棍」踢法，進攻甚為單調。直到1996年，法國教頭雲格接掌阿仙奴帥印，大打「華麗足球」，為英國球壇帶來新氣象，亦令Eddie開始追隨阿仙奴，一捧已是24個年頭。多年來見證雲格帶領球隊兩度成為雙冠王（英超及足總盃），更曾以不敗姿態勇奪英超冠軍，造出跨季49場英超不敗紀錄，風頭一時無兩。不過，自從兵工廠主場由高貝利移師酋長後，球隊彷彿失去奪冠能力。自2005年贏得足總盃冠軍後，三年又三年，三年之後又三年，大概沒有廠迷會想到，當年英超班霸會落得「九年無冠」的尷尬局面，「支持咗咁多年，印象最深反而係呢段時間，捧一隊波可以九年都冇一個冠軍，係會失落，但作為球迷只能夠等」，Eddie苦笑道。
阿仙奴曾造出全季不敗奪冠佳績，可惜之後無以為繼。資料圖片
雲格雖為阿仙奴鞠躬盡瘁、造就無數豐功偉績，奈何成績不濟，作為主帥的他自然成為頭號罪人。九年間，「雲爺爺」飽受球迷冷嘲熱諷，過份篤信小將、戰術守舊、因守財而賣走主力等指控不絕於耳。縱2014年以足總盃錦標打破冠軍荒，但球隊始終與英超寶座「無限接近」，球迷間開始傳出要求易帥的呼聲；但亦有廠迷認為雲格在「限米煮限飯」下能連年保持歐聯資格難度甚高，不能強求，漸漸掀起「反雲黨」及「迷雲黨」間罵戰，Eddie自然屬後者：「我係因為佢（雲格）先開始支持呢隊波，佢對球隊影響好深。我諗咁大個人除咗對住個老竇，對得最多就係佢。」當年Eddie聯同一眾香港廠迷到場支持雲格，甚至試過眾籌租用飛機，在球場上空展示支持「雲爺爺」的橫額，以示對這位名帥的尊重：「我覺得一個老人家為球隊帶來咁多殊榮，應該值得光榮退休，冇必要咁樣鬧佢。」雲格去留或者難有定論，但成績倒退卻是不爭事實，阿仙奴連績兩季跌出英超前四，雲格最終辭職，結束22年執教槍手的歲月，黯然離開酋長球場。
雲格在執教阿仙奴後期成績不濟，球迷分「反雲」及「迷雲」兩派。資料圖片
睇波以外，Eddie最大嗜好就是收藏球衣，至今擁有逾3000件珍藏，其中逾八成為簽名波衫，甚至需要租用迷你倉擺放心頭好，「男人總有樣嘢敗家，爭在敗喺邊樣。屋企人開初都唔反對，去到後來見到你咁瘋狂都有少少微言，但都係一種正當興趣。」
一代名將柏金患有飛行恐懼症，退役後甚少出席公開活動，要覓得其親名簽名球衣相當困難。
大概Eddie也沒有想過，當日的「敗家」嗜好今日變成餐廳的一部份。他投身社會後一直在飲食業打滾，由廚房幫工起步，到近年在酒店擔任行政總廚，最終仍然選擇放棄高薪，創業開餐廳：「我諗你問十個廚師，九個都有諗過自己開餐廳。當刻諗反正自己40幾歲，仲算後生，畀幾年時間自己，最多衰咗咪返酒店打工。」最終他與朋友合資，在旺角開設第一間Lockeroom Dining，並在去年情人節開業。
西廚出身的Eddie在飲食業打滾多年，西餐菜式是其強頂。
作為樓上舖，自然要有噱頭招徠顧客，想到自己最愛睇波及收藏波衫，Eddie索性以足球為主題打造餐廳：「第一間舖剛開張時乜嘢波衫都有，連國家隊都有，始終第一次搞餐廳，唔知應該點樣定位。」去年餐廳生意不佳，Eddie就帶同新波衫轉換餐廳裝飾，漸漸店內擺滿阿仙奴的波衫及裝飾，「試過有對情侶上嚟食嘢，問：『原來係阿仙奴cafe嚟嫁咩？』，原來不知不覺已經全部擺晒阿仙奴嘢。」
店面掛滿簽名球衣。
球星閃卡亦是珍藏之一。
兒時踢波守龍居多的Eddie對門將波衫情有獨鍾，幾年前暑假兵工廠到北京踢亞洲之旅，他到場支持愛隊。當時他為索取隊中門神施治及奧斯賓拿的簽名，唯有放棄現場不少球員，故印象特別深刻，更將兩件球衣掛在餐廳門外作擺設，不料遭盜竊：「當時啱啱開舖，唔熟悉個環境，諗唔到呢啲嘢都會有人偷，返到嚟睇到唔見咗都好傷心。」
當年在亞洲之旅與施治的合照。雖球衣被盜，但Eddie仍將此合照貼在舊舖留念。
一件件簽名球衣的價值早已超越物質，更盛載着一個個追隨兵工廠的美好回憶：「飛到去當地見到啲球員，好似蘇甘保咁，一個世界級球員喺我面前咁近距離幫我簽名，嗰個感覺一世都唔會忘記。」
足球場上敵我分明，同市隊伍宿敵味甚濃，作為球迷當然心中有數。不過，對於不理解足球的女朋友而言，要分清曼聯及利物浦或已是千古難題，遑論理解倫敦市的恩怨情仇，繼而不時鬧出趣事。Eddie笑言曾有女顧客帶同球迷男友來到慶祝生日，不料對方是宿敵熱刺球迷：「一入到嚟，個男朋友已經問『喂！你做乜帶我嚟呢度，你知唔知我最憎呢隊波？』女友就話『我唔知喎，你哋有分嘅咩？你鍾意足球呀嘛，咪帶你上嚟！』好彩最後生日飯都食得開心，我仲送咗個甜品畀佢慶祝生日。」Eddie邊笑邊憶道。
Eddie將酋長球場及「雲爺爺」的背影貼在油麻地新店內。
亦曾有女顧客訂座時，稱男朋友最愛謝拉特，問Eddie其男友會否喜歡這裏，「我話『我對謝拉特就冇乜意見，但你問吓佢介唔介意喇，因為呢度係阿仙奴主題。』」雖餐廳以阿仙奴為主題，但他認為客路無因而收窄，笑言甚至有熱刺球迷主動來到「踩場」，「睇吓你阿仙奴幾巴閉！」成為敵對球迷間的小幽默；近年亦多了不少球迷以外的客人光顧：「我整到舖頭幾靚，啲波衫有幾珍貴，但餐廳最重要都係食物，嘢食好食自然吸引到客人，好似依家舊舖好多客都唔係球迷。」
雖以足球為主題，但餐廳食物亦有一定水準。
Lockeroom Dining開業不久，香港就爆發反送中抗爭運動。餐廳位處旺角核心地帶，雖附近時有示威衝突，甚或煙硝四起，但Eddie認為對生意影響仍屬意料之內：「我知道當晚有示威，可能開唔到，可以做好準備，提早閂門，慳返啲燈油火蠟。」奈何武漢肺炎疫情來勢難料，對生意打擊絕對較社運來得更嚴重。今年農曆新年前夕，疫情開始從內地傳入，香港接連出現確診個案，市民人心惶惶不敢外出，Eddie憶道市況最差試過整晚只得兩位客人：「我喺香港土生土長40幾年，未見過傍晚六、七點行出彌敦道，（路上）啲人係十隻手指都數得晒。」更甚是當時政府未有現行的防疫措施，令他只能開門等生意上門：「當時仲可以正常開門，咁我無理由唔做生意，萬一真係有客人上嚟點算？只能開住門等生意，嗰下係最難捱。」
武肺疫情禍港近一年，Eddie不諱言打擊絕對較去年社運來得更嚴重。
捱過第一、二波疫情，生意曾回復正軌，但隨後又遇上兩波疫情，加上政府強推限聚令及禁晚市堂食等措施，更令生意雪上加霜。12月下旬坐擁聖誕加上除夕檔期，本屬是西餐旺季，但晚市堂食禁令延至明年，Eddie坦言只能「盡做」，唯有轉型做外賣到會自救：「始終開餐廳都係想人哋享受食物同環境，但無辦法都要諗計頂埋個12月，感恩過往都有唔少客人搵返我哋幫襯，都接到唔少訂單。」餐廳開業至今一年多，他不諱言餐廳生意從未如當初預期，「開咗咁耐生意都未順風順水過」，但仍無阻近月在油麻地及佐敦開分店。Eddia透露早有預留資金計劃今年擴充，加上市況低迷租金下調，促使他決定逆市放手一搏，期望疫情盡快回落。
今季阿仙奴成績低迷，甚至要以徘徊降班區邊緣的第15名(截至25/12)過聖誕，問及Eddie對球隊成績「不佳」有何看法，他亦忍俊不禁，笑道：「嘩！你講得都好客氣喎，哈哈！」眼見愛隊跌入低谷，他仍然抱有期望，皆因他早已視阿仙奴為信仰，「踢得好梗係開心，踢得唔好，上啲討論區鬧完發洩完，訓醒咪下場再嚟過，無論如何都係照撐，最怕自己有一日唔再鬧，對隊波死心。」他認為今季球隊成績未算太差，至少一眾小將在歐霸表現不俗，但指球員與領隊阿迪達關係影響士氣，希望下半季可以有所改善。
「阿仙奴就好似一個family，就算踢得唔好，係阿仙奴嘅人我都會支持。」
漫長的2020年尚有幾日就結束，但願新一年香港可以如Eddie所講，與阿仙奴一樣捱過低潮，「雨後見彩虹。」
-----------------------------
《體蘋果》陪你睇波講波
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！