無樓想買樓，有樓想買多層樓，香港人，炒樓！就算逆權運動，黃藍是政見，好多人不忘伸個頭出來望吓樓價跌未？在時代革命之際，暴政更妄想用「鬥地主」、「高樓價」轉移民意視線，那就是看穿了香港人，中樓毒！《蘋果》追訪一些素人過去一年買與不買的心路歷程。80後港男Chatster自覺中樓毒中到刻骨銘心，租樓6年都堅持不買樓，「我任何時候都有實力買樓，我唔買咋嘛！」今年初低位，他認為低處未算低，卻緊接樓市大陽春，不足半年升逾一成。對港樓一度死心，去年已實地考察烏克蘭樓盤，但空手而回。

如果Chatster樓毒入骨，那麼北上做地產經紀的90後港女Erica就是上腦，賣樓讚樓香情有可原，卻說當年鼓勵入市的King Sir是「啟蒙者」，「聽到佢講財務自由4個字好興奮」，那不是樓毒就是錢作怪。《蘋果》安排下，Chatster與Erica二人原先打算齊齊北上直擊大灣區樓盤。相約6月中山見，卻爆發前未所有的逆權運動，「約會」無疾而終，其後樓價逆轉。來到12月，全年樓價升幅近乎蒸發，堅持只租不買、一直未出手的Chatster睇完灣仔僅200方呎劏房，竟然還價！租樓6年，最終會否變成他口中的「樓奴」？

80後港男Chatster 6年前踏上租租這條路

Chatster在香港讀設計出身，2008年畢業後，2013年哥哥成家立室，帶阿嫂及姪兒回父母家，「屋企唔夠住，我焗住搬出去囉，同埋想有自己空間。」最終以約1.5萬元租住觀塘洋樓約400方呎兩房單位。第一次訪問是今年2月14日，中美貿易戰已現曙光，樓市呈現見底迹象，陸續出現二手業主反價封盤。當時他堅持只租不買，「我任何時候都有實力買樓，我唔買咋嘛！」他一邊講，一邊抱住愛貓，漫不經心地說：「擁有一層樓唔係人生必要，買樓係地產商畀你嘅願景……香港人中樓毒中到不得了，出街播樓市有關嘅嘢，個個都傾樓價，新年去拜年個個都問買樓未，香港人中樓毒中得好緊要，我都中到刻骨銘心。」

自認中樓毒，有錢買樓卻不買，「我哋年代經歷過沙士，知道其實有好多黑天鵝。我畢業出嚟嗰年就係金融海嘯。97年樓市爆煲跳樓、燒炭，潛移默化畀自己知，當你去到咁盡嘅時候，有機會瀨一鑊好勁。」見過別人摸頂，「我心態就好保守，因為2008年後樓價一路升，不斷升，一年一年咁升，無停過。我死都唔信邪，覺得有機會加息，係咪先，又有機會有黑天鵝。」他又解釋，某程度與自己從事室內設計及裝修工作有關，「2013年自己跳出來開檔，想留多啲現金，所以唔想買樓住。因為有時做啲工程項目需要墊支，有啲要墊一百幾十萬㗎，現金流要夠，啲工程先安心做。如果我做生意嘅錢滾得多過層樓嘅租金回報，咁我係咪起碼叫做跑贏樓市？」

目前租住的單位市值約600萬元，「5年後唔會1,200萬元啩！」他曾對港樓死心，去年跟朋友曾到烏克蘭睇樓盤，「有諗過搵夠筆錢移民烏克蘭，嗰度好平。香港唔係我條根，香港唔係我認識嘅香港，有500萬、600萬元現金都可以走去烏克蘭，唔係講笑嗰度20萬元都買到樓。」

Erica中山狂掃逾百車位

如果Chatster叫樓市淡友，那麼90後港女Erica剛好相反是樓市好友。她以前是本港的幼稚園教師，3年前參與樓市專家葉景強（King Sir）樓市講座後，「King Sir係我啟蒙者」、「最記得佢講財務自由，聽到呢四個字我就好興奮，好憧憬」、「King Sir都話買股票可能一、兩個贏，但買樓八、九個都會贏」。

一直有出席King Sir樓市講座的Erica今年3月再次到場，當天她接受訪問談及自己首次置業，「當時我仲做緊老師，想法單純，只係儲錢，同埋有個屬於自己嘅安樂窩。第一個物業係2014年，當時係喺深圳，層樓首期十幾萬，月供都係3,000幾蚊……之後深圳樓市突然一下子升咗好多，賺到人生第一桶金。」接着她在中山開設房地產公司，「而家我自由好多，自己想做咩可以自己安排。而家喺香港就唔係好多樓，都係得一間村屋。」

Erica在香港有一間村屋，大部份資產投放在內地，「我會投資停車場，一買就100個、200個車位。因為其實我哋而家係啱啱好遇到時機，係大灣區發展。如果早十年或者遲十年，我哋都遇唔上呢個時候，所以而家係一個好幸運嘅時候，大灣區真係發展緊，所以肯定捉住機遇。」

3月份樓市呈現小陽春，二手價回升，中央已公佈《粵港澳大灣區發展規劃綱要》，香港鼓吹大灣區買樓的宣傳排山倒海。一直有海外置業念頭的Chatster都受到這氛圍感染，蠢蠢欲動想睇大灣區樓盤。既然Erica如此硬銷大灣區，雙方約定直擊大灣區樓盤，鐵定6月13日中山相見。究竟Chatster租樓意志堅定，還是經紀Erica賣樓把口勁？

撰文：陳家雄
採訪：陳家雄、張嘉鎣、朱得志、陳新政
影片編撰：張嘉鎣
攝影：S.dragon、Kin、Kenji、Gary、細釗、黃偉傑、鄭嘉峻、陳錦源
剪接、後期、編導：何文超
編審：楊智佳

-----------------------
屬於香港人的移民攻略
立即登入【全球樓行】
Dream House零距離