王賢誌(Vinci)、蔡加怡同馬清揚噚晚喺啟德郵輪出席東華三院慈善活動，作為搞手的Vinci帶埋同性伴侶Kevin嚟，佢就話：「呢個郵輪係自己創辦，見到呢隻郵輪覺得好適合，自己好鍾意坐郵輪，所以一拍即合做呢個善事。」問到佢上個月同Kevin結婚一周年，佢就話上咗郵輪玩：「計埋呢次，上咗4次，因為好方便，自已又鍾意同啲朋友飲嘢，喺船上面飲到幾夜都冇所謂，之後想瞓隨時上房瞓，一大班朋友約埋一齊好好玩，兩個人都有去。」

記者問佢結婚周年有冇浪漫事發生，Vinci笑言沒有：「都識咗7、8年，都唔需要兩個人浪漫，佢覺得唔需要特別浪漫，有安排live band畀啲朋友點歌同跳舞。」Vinci透露自己雖然忙，但Kevin唔會詐形：「佢真係冇所謂，佢鍾意自己私人空間，有時寧願我忙啲。」