每次中南海以至香港政府有咩風吹草動，中央「權鬥」嘅說法就會不脛而走，估唔到連乒乓球隊換人都有「陰謀」？中國乒壇名將劉國梁喺周二俾乒協撤走總教練一職並改任乒協副主席後，同劉國梁相識20年、並透過對方認識另一乒壇名將王楠繼而結婚嘅郭斌，連日來喺微博為好友抱不平，包括噚日喺微博公開宣稱，乒球男女一二隊喺乒協傳達「換馬」消息前一小時被禁止用微博甚至「點讚」，質疑係禁止球員向外界表達意見，矛頭直指部份高層領導。

郭斌到今日中午再次喺微博發言，駁斥媒體指改革為重嘅論調，批評有人「利用改革玩卑鄙」、「為私利打擊英才、排除異己」云云…連同劉國梁嘅前男雙拍檔孔令輝，早前因為欠下賭債捲入訴訟，將會被體育總局黨委依據黨規黨紀做出嚴肅處理，即管睇吓呢件事點收科。