田少昨日生日，八方首先祝佢牛一開開心心。唔知佢喺生日之時，記唔記得佢嘅前僱員史文鴻呢？好多自由黨人講過，史Sir喺自由黨搞政策時，同田少、莎姐等人意見唔啱，至少班領導層唔係太重視政策研究，所以史Sir一直被投閒置散，冇幾耐重同自由黨講byebye㖭。
不過，史Sir喺分析選舉戰況上都有一定實力，所以早前政改方案重生死未卜時，原來田少都有打過電話畀呢位前僱員，請教一吓佢關於區議會選舉議席嘅問題，好明顯田少係擔心方案一旦通過，佢哋唔知點搞個選舉好啦。
最終政府方案不獲通過，田少當然冇再打電話畀史Sir。有時揸喺手嘅嘢，好多人都唔會珍惜，冇咗就籮籮攣。呢一種滋味，唔知田少定係史Sir會更感同身受呢？

傳真︰2623-9278
電郵︰[email protected]