菜肉魚之有單為憑:套餐6味份量差無幾埋單平一半
上個禮拜晏晝出咗去沙田食飯,發現有個套餐,有湯、有菜、有點心,半價大平賣,梗係第一時間就call埋friend衝入去試試,睇吓係咪真係咁抵。一試之下,發現價錢的確平咗一大截,不過份量就無乜少到。
記者:梁學文
攝影:譚盈傑
Model:Sonia、Eppie(thegroup)
特價套餐共有5個菜,攞埋門口張傳單就會有多一款小菜或者湯羹送,變相有6味,埋單實收$185,即係四個人平均$46.3。如果散叫六個同樣菜式,埋單就要$394,每人就要$98.5,套餐足足平咗一半有多,而且份量有番咁上下,壯男如我連下午茶都食唔落!
午市特價套餐可以揀一款點心、一款湯羹同三個小菜。四款湯羹之中比較吸引嘅係鹹肉豆腐湯,至於五款點心中,紅油抄手就最惹味,其次就係生煎包。揀完點心同湯羹就可以喺21款小菜入面揀三款,小菜原價由$38-$72。21款小菜有魚有肉,唔食肉嘅又有素菜類可以揀,總有啱你taste,而且喺門口攞張傳單重會有多一款小菜或湯羹送,有醉雞、酸辣湯或回鍋肉等,散嗌每款都要五、六十蚊,月底荷包乾涸都唔使驚啦!
為要證實呢個半價套餐無花假,記者除了細數每碟餸嘅件數,重帶埋量杯,睇吓個湯嘅份量有無少到……
鹹肉豆腐湯即係上海人講嘅醃篤鮮,鹹香味比較重。用鹹肉煲同用金華火腿唔同,鹹肉肉味較重,而且入口無金華火腿咁硬。除咗鹹肉,呢款湯重有腩肉,雖然肥肥哋,不過就好好味。豆腐湯入口鮮甜,鹹肉則有引出口感的作用。
套餐由砂鍋改用湯碗上,比散叫一鍋豆腐湯少咗唔夠100ml、少咗冬笋,不過就多咗小棠菜。
一般上海舖頭會淨係用豬肉做,不過呢度就加入咗蔬菜,平衡番豬肉嘅肥膩感,而且入口重多咗爽口嘅感覺。醬汁最特別嘅地方係帶甜,因為師傅加入冰糖煮醬汁,令醬汁味道辣中帶甜,連蒜一齊放入口就更加惹味。
套餐有五粒,比散叫少咗一粒,不過見係四人餐,一人有一粒,都OK啦!
鱔糊有補血嘅功效,入口腍滑,而且用由印尼入口嘅幼身鱔做鱔糊,唔會有孔雀石綠,可以放心食。鱔糊最佳食法係夾銀絲卷,鱔糊銀芽爽,銀絲卷就軟綿綿,一爽一軟非常夾。
驟眼睇好似差好多,細看之後原來係啲餸堆高咗,點算之後銀芽少咗幾條,同唔見咗三塊鱔,味道則不變。
愛辣就會鍾意呢款辣子雞,一上枱就有一陣攻鼻嘅辣味。辣味係來自大大粒嘅四川燈籠椒,不過呢款椒淨係得攻鼻,入口唔會有指天椒咁辣,絕對可以試試原粒放入口。雞塊經醃過,更加嫩滑。
特價之後少咗幾粒燈籠椒同三件雞塊(原價有12件雞塊),不過燈籠椒少咗影響唔係好大。
賽螃蟹係一款無膽固醇嘅菜,係一個健康之選。𠵱家有禽流感,所有家禽類都要煮熟至可以食,賽螃蟹要用100度滾油做,而且不會加生蛋黃喺面,保證一定熟透又衞生。喺面頭放上乾貝同火腿茸,香口之餘又有口感。
呢款用門口Coupon換嘅小菜份量一啲都唔少,差唔多有半隻雞,而且好入味,所以入座之前一定要攞傳單,咁就免費多一個小菜,變相再減價。
雖然套餐中的五味餸(未計免費醉雞)整體比散叫的份量少了,但經過細算下相差的確不太顯眼,最吸引係比散叫平成半,糧尾都想食豪啲?𠵱家有多一個選擇。
嚼江南(26280282)
地址:沙田新城市廣場三期A197b
營業時間:11:30am-11:00pm
特價套餐供應時間:11:30am-3:00pm