上個月搞完生前葬禮嘅夏蕙姨,今日又有新嘢搞喇,傍晚佢就同埋近日流出不雅片嘅Amy、河國榮同綠魔等,喺九龍塘搞咗個冥婚FashionShow,不過唔使驚,因為現場一啲都唔恐怖嘅。
夏蕙姨就話廣東人一直以嚟,都好緊張農曆7月要燒街衣呢個習俗,自己亦都一直有做,以前仲會約埋祥嫂一齊燒。
講起高志森被指搞騷搵尹光大唱祥哥經典金曲,不過祥嫂就完全唔知,夏蕙姨就話喇:「後輩就應該尊重前輩嘅,講一聲好閒啫。」
佢又話對Amy嘅不雅片流出覺得係閒事:「同男朋友開心,影吓相實有嘅,點知會比人拎出嚟,對佢唔公道。」佢又話Amy都係受害人,流出因為非佢所願喎。
有份出席嘅河國榮就話,網上嘅售賣首飾生意,進度比預期慢,又準備喺淘寶開鋪喎。
另外佢有份演出,同林家棟、林德信等合作嘅新片,10月就會上映,佢就話自己都好心急同期待。