事隔足足一年，足全年人工唔使做嘅暗角七警終於落鑊起訴，但又點估到喺暗角俾人狂毆嘅阿Ken曾健超，原來仲好打過葉問，同日竟被控襲警咁巧合。仲有乜嘢估唔到？就係一年前警隊最高負責人、前一哥曾偉雄竟然喺呢啲咁敏感嘅日子，現身灣仔警察總部！唔通……佢專程嚟同呢七位「死士」講句「你哋冇做錯到」，加油打氣振作士氣？

常言無官一身輕，冇見幾個月嘅曾偉雄行步路都輕鬆過人，中午時分靜雞雞由側門步出警總，沿昔日佔領區入口、告士打道往金鐘方向離開。原本喺警總等消息嘅記者發現咗呢位稀客，梗係即時飛撲過去影餐飽，佢全程面露微笑任影，有記者問佢點睇七警終於被落charge？佢就叫記者「問番家啲同事比較好」，之後就封口唔再講嘢喇。

曾偉雄今年5月初開始退休前休假，有人話畀八方知，原來佢儲埋儲埋好多假未放，所以今時今日都未放完，未正式退休㗎。而今日現身警總確實係另一個巧合，佢係返嚟處理私務，同七警案完全無關咁話喎。乜嘢私務咁緊要，要佢專程現身呢？