好嘢自然多人吼！熱刺射手哈利卡尼表現一季比一季好，喺前線嘅威脅力同入球力越來越強，熱刺要留住呢位青訓都唔係易事，領隊普捷天奴就識玩喇！叫24歲嘅哈利卡尼學羅馬王子托迪做one-club man咁話，呢招都算絕！

熱刺今晚歐聯作客皇家馬德里前，直情有啲傳聞講卡尼可以做C朗接班人。要同皇馬爭人，講錢熱刺輸梗，唯有動之以情啦，普捷天奴就叫哈利卡尼學吓托迪，做世界少有嘅one-club man：「佢上季尾睇托迪嘅羅馬告別戰相當激動，最值得激動嘅一點，就係托迪只踢過一間球會。我認為哈利卡尼都有呢個潛質，最緊要係佢喺度好開心，雖然冇人知道明天會點，不過卡尼由青年軍出身，身份認同感夠晒，亦都代表住熱刺嘅核心價值。」

主席利維之前話過，普帥可能留喺度再教15年，普帥就講笑話希望快啲簽到呢份超級長約：「呢樣要睇主席喇！不過我就好享受教熱刺嘅時光，球會好有潛質，新球場新設施呢啲配套都係歐洲頂級，我哋而家要成為一支可以贏冠軍嘅球隊，我都好希望可以留多10-15年，利維最好即刻畀約我簽啦！」