51歲嘅王祖賢息影後，長居加拿大，偶爾喺社交網都會見到佢嘅蹤影。唔知係咪佳節前夕，近日佢嘅粉絲微博就曬咗兩張佢嘅近照，仲留言寫住︰「聖誕快樂！」不過據台灣《蘋果日報》報道，幾個月前，有網民拍到王祖賢同朋友去食火鍋，當時佢駝背屈住坐，顯得身形似水桶腰。

而近日晒嘅近照，佢就着住灰色冷衫襯牛仔褲騷長腿，仲挨住牆用手撥弄招牌嘅長髮，身形依然纖瘦，唔似有水桶腰；而另一張相，佢就頭戴冷帽，面尖尖個樣同以前冇乜分別，不減往日「小倩」嘅仙氣。至於拍攝嘅背景，疑似佢加拿大嘅屋企，暖爐旁有聖誕裝飾，家居布置簡潔，有網民就留言話︰「還是美得那麼驚心動魄」。

精選娛聞，喺晒《娛果》
http://fb.com/appledailyent