「志明」與「春嬌」已經成為好多香港人嘅集體回憶，相隔5年，彭浩翔再次執導《春嬌救志明》(春嬌3)，口碑同票房成績都好好，日前已打破周星馳同徐克今年套賀歲片《西遊伏妖篇》所保持嘅2,439萬元紀錄，而截至昨日為止《春嬌》已經有2,539萬元，成為2017年華語票房冠軍!

相信唔少人睇完《春嬌救志明》都會有啲意猶未盡，好想去追尋吓春嬌同志明嘅影子。電影公司方面，為咗答謝影迷同參與過拍攝嘅商戶，搞咗個回饋社區活動。由聽日起，一班影迷可以去到取景店舖打卡之餘，仲有機會得到《春嬌救志明》紀念貼紙，裏面全部都係食番電影入面嘅啜核對白，好似「跟住呢」、「腿張開」、「Asshxle」等等。

回饋活動參與商戶：

1/ Isabel及Brenda大跳《傳說》嘅花店，尖沙咀白紙花舍be tabula rasa

2/ 春嬌姐妹團研究可疑短訊嘅餐廳，西環teakha kitchen 茶。家廚房

3/ 春嬌姐妹團研究中女病症嘅餐廳，西環Artisan Garden Cafe

4/ 春嬌爸爸影婚紗照嘅影樓，堅尼地城Studio ethos

5/ 春嬌姐妹團去嘅Salon，中環Salon Amarone

不過都要提提大家，貼紙款色係隨機派發，數量有限，送完即止㗎！