韓國人氣綜藝節目《Running Man》（RM）嘅宋智孝同埋金鐘國之前屢次傳出緋聞，仲被稱為「能力者CP」，由於「周一情侶」智孝同Gary已「分手」，所以唔少粉絲都希望智孝同金鐘國成為節目嘅新情侶。

早前智孝以嘉賓身份，出演金鐘國同佢媽媽都有份演出嘅節目《我家的熊孩子》，智孝嘅一集喺噚晚播出，當中智孝就大受現場媽媽嘅歡迎，特別係金鐘國嘅媽咪就對佢好熱情。喺節目中智孝就被一班媽咪追問有關拍拖同結婚嘅新聞，對於同金鐘國傳結婚，智孝就話：「我同金鐘國oppa本身就好熟，大家關係好好，出咗咁樣嘅報道，我哋都係一笑置之。」金鐘國嘅媽媽就失望話睇嚟智孝對金鐘國就冇乜意思，智孝即急急澄清話：「工作嘅時候唔可以夾着私人感情，同金鐘國係同事關係。」

另外，智孝同時亦有出演JTBC綜藝節目《認識的哥哥》，喺最新預告中，智孝仲不顧儀態，喺節目中使出打額頭絕招，一巴掌就KO姜虎東，令「不良智孝」再登幕前。

更多韓流，喺晒《娛果》
http://fb.com/appledailyent