特區文革風暴，愈玩愈大，終於正式國際化。李柱銘等四師徒去到美國，原來不止去國會有碗話碗，有碟話碟，重叫埋兩飛，直頭入白宮，榮獲美國安全顧問賴斯接見，另外重有助理國務卿等高官。至於布殊，會唔會去完廁所行過條走廊，經過會客室，「無意」中撞見李柱銘，順道握手寒暄問候，叫佢有乜問題，即管同賴斯講，好似當年見達賴喇嘛咁有創意，睇嚟都視乎布殊心情。

李柱銘獲和平獎不是夢
李柱銘有得見賴斯，都係因為有人喺特區亂咁賴屎。甚麼狗餅論、黑四類，搞到臭崩崩，北京拒絕溝通，土共亂發噏風，咁又造就埋李柱銘再次揚威國際。咁搞落去，李柱銘同司徒華，睇怕好快就會榮獲埋諾貝爾和平獎，繼港人葉錦添開創攞奧斯卡紀錄之外，重會開多一項港人威威嘅國際紀錄。
難怪國家級嘅唐唐，作出黑色幽默式回應，話李柱銘冇必要去到咁遠「拜廟」，請「洋菩薩」。冇辦法咧，鬼叫中央搵人問鄧小平米先，代表鄧小平亡靈「解釋基本法」。李柱銘惟有去美國拜廟請洋菩薩，對抗鄧公問米幽靈，有基本法不依，特區搞到迷信風氣咁盛，又係孰令致之？