政務司司長「肥仔張」張建宗今午頂替娥特，出席獲多間著名食肆力撐，每星期都教導自閉症人士同弱勢青年廚藝，令佢地可以自己進行簡單煮食的「樂廚，落廚」活動畢業禮，名廚「阿一鮑魚」駐香港大使楊貫一都現身撐場。

肥仔張話，呢班廚師好有心教導年輕人煮食，除咗有助佢哋就業，亦令佢地可以煮飯畀屋企人食，形容呢個活動係「全贏」咁話。有份推動呢個活動的《經濟日報》副社長石鏡泉，就喺「肥仔張」致辭後，突然攞咪向張建宗「揼心口」，話其實最緊要政府肯畀錢，開放各區的政府廚房，買啲食材畀學員煮喎，肥仔張聽到就尷尬笑咗吓，未見回應。

肥仔張之後就睇一班學員示範煮雞翼，再即場食咗一位學員整的煎蛋。肥仔張大讚隻煎蛋新鮮熱辣，真係好好味，仲大讚「個鹽花好正啊！」肥仔張離開時就話，政府過去10年就復康服務投入的資源，已由166億元增加至去年的324億元，增幅多近一倍，反映政府好關心復康人士，話未來最緊係要「民、商、官」一齊去做嘢喎，唔見有回應石鏡泉建議。似乎要政府開放個熱廚房，真係唔容易喎！