剛踏入28歲嘅鄧小巧，噚日（24日）喺中環舉行生日會，適逢新歌《兩溝》，生日會亦將歌迷、電台聽眾、街上途人「溝埋一齊」開party同玩遊戲，有歌迷更帶埋老婆仔女出席，全場大合唱生日歌同切蛋糕，非常熱鬧。席間小巧仲俾偶像林宥嘉嘅祝福短片同禮物搞到眼濕濕！

今年係小巧第一次搞大型生日會，感覺新鮮同難忘。佢話：「今年生日願望同往年一樣，希望大家都身體健康！」問小巧大一歲有咩計劃？佢哈哈大笑話：「其實一直都希望練出腹肌，但我實在太為食啦，加上近來生日好多飯局，好多朋友約我食食食，要等食晒啲生日飯重新操練，唔好話腹肌咁勁，練返啲腹部線條已經好好。」

自稱失暈魚嘅小巧仲大爆生日瘀事：「因為要着呢條咁靚嘅紅色裙，朝早特登攞對高踭鞋襯，點知嚟到換鞋先發現攞咗兩隻都係左腳，笑到肚痛之後仲要衝落街買對新鞋！」