對於一手潛在供應按季減少1,000伙，中原測量師行執行董事張競達表示，下跌少少唔出奇!政府自2012年起多推地皮，一般有6年時間予發展商興建物業，個別一、兩季數字下跌，是因為有啲發展商腳步快啲，有啲慢少少，屬正常現象。政府過去數年持續維持，今明兩年會見到陸續增加，預計2018至2019年是高峰期。

他指出，睇返全年住宅供應量，政府數字今年料達2萬伙，其測量師行今年估計由1.8萬至近2萬伙，相信全年供應量料創14年新高。大方向，供應量將越來越多，由於入則及施工期時間差異，一、兩季波幅並不出奇。短期對樓價影響不大。發展商投地後，需於一定時間內興建物業，投放資源及成本，固然望資金盡快回籠，就算慢極，都有個譜。

樓市除了睇供應，還要睇需求，供應持續增長，自然壓抑需求，但需求同時增長。整體經濟環境不差，剛性需求尤在。土地供應越來越多，政策沒轉變。幾時衝破十萬大關，好難預計。目前供應暫時滿足需求，唔會令樓價飆升，會否太大波幅，除非經濟逆轉，同時面對大量供應，或突發事件，樓價或會大幅調整，否則短期不會大升大跌。

記者:陳家雄

蘋果財經，關心你飯碗
http://fb.com/appledailyatm