唐詩詠、周家蔚、陸詩韻、林忠豪今日喺尖沙嘴出席眼睛健康基金十周年慈善晚宴，王秀琳同霍震寰29歲孻仔霍啟文打得火熱，佢透露最近做辣醬小生意，係自己品牌，在網上零售，投資6位數。問到男友係唔係支持同埋做白老鼠？佢即時落閘話：「唔講呢啲，都係專心做醬料。」問到係唔係男友屋企人畀壓力？佢話：「其實一直以嚟都覺得感情事唔應該太公開，以前我係娛樂圈嘅，但o依家話我唔係娛樂圈，都唔會有人認同，但唔好咁張揚。」

講到係唔係想保護戀情？王秀琳話：「唔關事，只係想畀人睇自己做嘅嘢，唔係情情塔塔。」之前被影到煮飯仔，好似好享受家庭樂？佢話：「呢個係報道啫，自己好樂意煮嘢畀屋企人同朋友食，總之身邊朋友都支持我嘅事業。」

同場孫佳君左腳着特製鞋現身：「生骨刺呀，之前做咗手術，o依家要休養6個禮拜，唔可以運動。」上周一踏入43歲嘅佢，問到是否未能狂歡慶祝？孫佳君說：「o依家生日都好少慶祝，正日喺屋企同囝囝一齊過，囝囝好錫我，連送咗三日蛋糕畀我，佢真係好好㗎，成日又打電話畀我，好過我男朋友，佢係我終生情人。」有否鼓勵你找伴？她說：「我估佢會妒忌囉，因為冇時間畀佢，o依家我已經好開心，個仔9歲，真係好sweet。」

好耐冇見嘅李若彤啱啱拍完大陸劇，問到佢會唔會拍港劇？佢話：「最緊要角色啱，演醜女都冇所謂，因為我定位係演員，唔係明星，但暑假免問，因為要陪姨甥女，又怕熱同曬黑。」對於被讚仙氣，佢話：「仙氣因爲小龍女畀我，其實都好感謝，咁叫好親切，好開心自己有咁作品，係無憾！」