思捷（330）N年前係好多中環OL喜愛嘅品牌，可惜呢支歌仔冇得唱好耐，大家都轉投ZARA、H&M等速食時裝嘅懷抱。即使思捷4年前從ZARA母公司挖角，搵嚟馬浩思（Jose Martinez）做行政總裁（CEO），4年期間都暫時未見公司脫胎換骨，馬浩思舊年仲要減薪四成㖭喎。
根據思捷最新年報，馬浩思舊年總年薪2,170萬元，較前一年銳減38%，主要因為花紅減少85%，由前一年過千萬減到只得215萬元，不過佢依然屬於上市公司高薪一族。

上任四年　股價跌四成

睇番思捷過去4年業績或股價表現，都係乏善足陳。4年入面有2年錄得巨額虧損，舊年只係因為出售香港寫字樓物業，先至扭虧為盈，實際經營業務仍然蝕錢。思捷股價更加係黃腫腳不消提，馬浩思2012年9月做CEO，當時思捷股價11元，噚日6.89元左右，唔見咗四成。按呢一個成績，CEO減人工似乎都好合理，否則都好難同股東交代。
其實思捷大部份業務喺歐洲，批發佔好大比重，所以唔能夠單睇香港零售店舖嘅情況去判斷佢生意好唔好，不過好多時行過ESPRIT門市，感覺都係冷冷清清，相對其他速食品牌，ESPRIT始終欠缺一種時尚嘅感覺，偏偏市場上越來越多選擇，客仔就離ESPRIT越來越遠了。

李華華
mailto:[email protected]