不經不覺已第78期賽事，換言之進入賽季倒數階段，相比起幾年前其實已到煞科日賽事，總場次亦無去到超過七百幾場次。

時代變遷，馬匹入口數字增加，做馬主的機會率提升，都需要有足夠賽事供馬匹競跑，所以業界討論從化開幕後，有九個馬房養馬量可加，全港馬匹數目必會有多無少，增加賽日或場數指日可待。

不過安排賽程的確可花更多心機，例如季尾期間高分馬或多或少已搏得多用得盡，出馬經常唔滿額；相反五班賽經常出現塞車情況，連同後備馬可多達二十多匹，部分練馬師出王牌都未必有得出賽，要加上優先出賽權才確保能正選出場，皆因季尾多減分落班馬，期待季內要交代。

當然賽馬是汰弱留強，高評分賽是水準自然高，觀賞價值提高，但現行評分制度造就識玩遊戲規則的玩家及馬匹，長期堆積眾多五班馬而無足夠賽程，只會令賽事水準每況愈下。

周三(6日)快活谷最尾第八場三班1650米，關鍵於前領馬多與少，「幸運時代」上仗操控超慢步速征服三班賽一放到底贏，今仗要視乎「紅旗星將」及「小米周」會否令步速加快，不過「幸運時代」韁口較易控制，如出現變化地更合，有2檔兼繼續見習騎師減磅，贏面仍大。

對手方面，「多項領先」上次賽前大閘已吸引眼球，結果在吳嘉晉胯下取勝，而且出自強組，比標準時間快得多，如正常步速，1檔守好位好跑可爭勝，有力和2檔的「幸運時代」包Ｑ。

「嘉應之友」季中轉倉兼落班仍未交代，賽前加眼罩試閘動態積極，但位望較濃。冷門「有獎」，季初贏馬賽績強，文家良馬房近期多冷腳，有賠率要防。