期指結算前夕，淡友果然發動全力反撲，恒指大跌564點，收18639，而H指收8133，更大跌380點。
大市調整，係意料中事，更可以話「來遲了」。噚日咁樣跌法，直情好似食咗瀉藥一樣，皇恩大「瀉」，令到食滯咗嘅好友，有機會清理一下腸胃，唞一啖大氣，等機會，又再開過餐。
期指今日結算，相信淡友仍會力壓，希望能夠執番多少。有人了解過佢哋嘅部署，若大市在18700至18600結算，對佢哋最有利。所以，今次調整市，唔排除會好快到底，今日早段可能挫一挫後，就止跌回升。
市勢大跌，但仍有107隻股票（唔計認股證）上升，而跌得少嘅強勢股亦有唔少。噚日提過嘅金威集團（910），收1.02元，跌4仙，成交又過億股。大升之後，在高位嘅承接力仍然咁強，難能可貴，整固完之後，下個升浪，有機會見1.20元。
強勢股有中信資源（1205）可以留意，收1.69元，僅微跌3仙，公司經過連串收購後，已發展成為中信集團旗下能源及天然資源嘅旗艦公司，今個月初，股價就曾升上2.02元，之後形成下降楔形，整固一完成，升破1.80元阻力，照度上去，有機會見2.40元。

洽購哈國油田快揭盅

目前中信資源在中國及印尼都擁有油田項目，包括中國大港油田孔南區塊（佔40%）、印尼Seram島Non-Bula區塊油田（佔51%），若哈薩克斯坦Karazhanbas油田（佔94.6%）的收購得以落實，中信資源將成為中國第4大石油公司。根據最新消息，哈薩克斯坦將在45天內決定是否批准中信集團的收購。
哈國油田的收購代價為19.1億美元，根據外資行估計，每年盈利（扣除因收購而出現的債項所引致的利息支出後）估約有2億美元（約15.5億港元），中信資源現時市值74億元，07年預測PE只係4.8倍，相當吸引。
郭兆誠