以前細細個唔少人喺食飯時間睇警訊，咁又真係多人睇嘅，就算個案拍得流流哋，觀眾都好接受。不過科技發達、視野唔同咗，o依家少咗好多人睇電視，而且對影片製作亦要求高咗！

杜汶澤下晝喺facebook轉貼咗一條《警訊》片，片中無厘頭講高空擲物，又拉埋啲阿爸唔准個女拍拖嘅元素，拍出嚟又真係幾cult，呢條片唔止引起電影人杜汶澤關注，寸《警訊》製作浪費公帑，hashtag打「我有交稅咖」！

原來仲引起「暴龍哥」鄭中基嘅關注，話晒之前拍電影《龍咁威2003》演警員「龍威」一角，曾經拍死搞過爆笑《警訊》，令觀眾笑爆肚之外，仲會記得經典對白：「Yo！我係你哋嘅節目主持人，龍威！」

鄭中基今日睇完阿澤fb轉貼嗰條《警訊》片，用私人fb帳戶留言：「我都想睇晒，但佢哋根本唔X係地球人，睇唔落去。」阿澤跟手回應已經暴露咗鄭中基嘅身份，回覆道：「乖啦!ending好笑過你迫我搞阿嫂!」

騾仔阿嫂……佢仲唔係暴龍哥！

鄭中基又再留言：「邊X度有人咁講嘢㗎啫，我知係對白，但返到屋企樓下，條女話我到喇拜拜，條仔扯X佢翻轉頭話咁你小心啲！做乜X啫，佢屋企有獅子老虎食X佢吖……」阿澤搞笑稱：「唔順呀？俾條Lan綫你嘞!」之後鄭中基就話：「飛咗去睇ending喇!」杜汶澤即答：「BTW，《龍咁威》mad警訊果場戲，原來仲冇《警訊》本身咁mad!」中基仲話：「佢哋一向唔抵得我做《警訊》叻過佢哋!」

杜汶澤就轉貼一條YouTube片……《龍咁威2003之警訊》……佢反問鄭中基：「你睇你，做咩啫你!」鄭中基抵死覆：「咩呀！做瓜《警訊》囉唔得咩！」

咁覺得《警訊》呢個劇情荒謬嘅，又真係唔只杜汶澤同鄭中基，仲有網民都睇唔過眼……

網民留言俾阿澤，佢哋咁樣講：

網民：「終於有知音人。其實我一直對用呢個方法拍《警訊》係反感的，但仲有好多人覺得咁係創意，我真係無言以對。」
杜汶澤先打tag「弱智不等如反智」，杜汶澤再覆：「其實個重點係拍果個，唔理佢咩來意，但係收貨果個係咪儍咖？定係根本冇睇？」

網民：「你…你…你還番呢7分鐘俾我！！你咪走呀你！！」
杜汶澤：「比條lan線你！」

網民：「乜X嘢戲本，乜X嘢編劇來?」
杜汶澤：「咁都算，但係乜X人in charge至係問題」