韓國兩大樂壇頒獎禮，《MAMA音樂頒獎禮》及《2017 Melon Music Award》(MMA)已經順利舉行，當中EXO喺兩個頒獎禮上都贏咗多個獎項，喺《MAMA》上連續五年得年度專輯，噚晚舉行嘅《MMA》又冧莊封年度歌手。

雖然連奪咁多個獎項，但身為EXO一份子嘅中國成員Lay卻冇反應，去年Lay都有來港出席《MAMA》盛事，喺台上致詞時仲被轟唔夠謙虛，而完騷後佢仲同隊友影合照，可見感情好好。去年Lay同樣有跟隊友喺韓國出席《MMA》，不過今年Lay就完全唔見影，就連隊友喺兩大頒獎禮連奪兩大獎佢都竟然冇反應。

有網民就發現Lay噚日就喺微博有轉載大陸演員王迅嘅留言，又叫大家要支持對方嘅電影，不過竟然就冇喺微博或者Instagram祝賀EXO得大獎。事實上Lay今年已缺席EXO嘅活動，雖然有指「限韓令」、「禁韓令」關係令佢就唔敢歸隊，但有粉絲亦都擔心Lay會步三位中國成員Kris、鹿晗及Tao嘅後塵退出EXO，令到EXO再次受到退團打擊。而有粉絲就喺網上留言希望Lay盡快回歸EXO，又指EXO需要Lay。

另外，喺前晚於香港亞博館舉行嘅《MAMA》事後有EXO粉絲質疑賽果不公，有韓國網民仲發起抵制《MAMA》嘅請願運動，現時已收集到逾1.7萬人嘅參與。

更多韓流，喺晒《娛果》
http://fb.com/appledailyent