【想搵人照顧?】江若琳都拍拖喇! 前HotCha成員Crystal話求包養
音樂會張紋嘉
Crystal噚晚喺合和中心舉行入行十周年音樂會。
前組合HotCha成員張紋嘉(Crystal)喺灣仔合和中心舉行音樂會,紀念自己出道10周年,佢喺開騷前接受訪問:「舊公司好撐我,成村人嚟幫手,好感動!自己有首歌送畀佢哋,都驚會忍唔住喊。今晚冇乜請藝人朋友嚟,因為面皮薄,唔想周圍叫人。」咁有冇邀請舊隊友Regen同Winkie?Crystal表示:「其實真係有請,不過佢哋都唔喺香港,好可惜,自己都準備咗HotCha時代嘅medley,本來希望佢哋聽到。」
講到會唔會搞HotCha十周年紀念騷?Crystal表示:「構思中,但有好多因素,要傾同就期,目前我哋各自有工作。當年第一次開騷得十日時間準備,如果再開希望有多啲時間。」咁有冇搵Winkie同Regen傾過?Crystal就話:「有,大家都想做,冇拒絕。」
而Crystal約滿唱片公司後,希望投身演戲工作:「好感恩,上個月開始接咗好多演員工作,覺得自己好幸運,坦白講,以前試鏡從來冇揀中我,反而啲人覺得角色啱先搵我,好開心,話做演員就開始有多工作。」記者笑問幾時想做人妻、女友?應該有拖拍?佢講笑:「我成日都話求包養,其實越唔諗先越會有。」記者再笑佢呢幾年梗係成日諗先冇男友?Crystal表示:「係啦,江若琳都拍拖,好戥佢開心。」問到有冇心酸呢?Crystal真情流露話:「少少酸啦,酸係自己心入面酸啫!」佢一路講一路笑,然後仲笑到標眼淚,要用紙巾印走淚水。