碧雲同八方講,佢7月時喺理大做視光檢查,發現視網膜嘅黃斑點位置「扯起咗」,內膜穿埋,故要做「黃斑內膜手術」,將啲氣打入眼球,等內膜慢慢癒合,同時佢做埋白內障手術。
碧雲話,手術係全身麻醉,兩項眼手術做咗近兩小時,雖然手術前做足心理準備,但係入到手術室真係驚到震,「我係驚到牙都震埋!」
佢話,麻醉科醫生同佢講,佢初時血壓爆升至180,做完手術就回落至152,但都仲係高,同時要留院一晚,今日可以出院返屋企,但要俯睡幾星期,呢排都係抬唔起頭做人。
佢話,已經向立法會同理工大學請咗一個月假,所以今朝立法會監察西九文化區嘅委員會傾M+博物館,佢都出席唔到。一個月後,啱啱就係特首林鄭月娥公佈《施政報告》,佢話到時應該可以好返睇實份《施政報告》,碧雲又話要多謝佢老公代佢去講課。
李八方