艾美獎頒獎禮剛剛先完結,新出爐艾美視后嘉莉兒佛伊(Claire Foy)新作已急不及待上場!今次佢竟然一改形象,做個超冷酷嘅天才女駭客。新作《蜘蛛網中的女孩》(The Girl in the Spider’s Web)係《龍紋身的女孩》(The Girl With The Dragon Tattoo) 續集,承繼上集劇情,今次佢再同《千禧》雜誌編輯龐米高揭開驚天陰謀。新預告中見到佢有唔少動作場面,又爆破又飛電單車,仲再次化身正義使者,以私刑對付賤男人!好多人都會將佢同上集荷李活版嘅「龍紋身女」朗妮瑪娜(Rooney Mara)比較,其實幾年前都有傳過朗妮瑪娜會連同「007」丹尼爾基格(Daniel Craig)回歸,可惜最後都唔成事。而嘉莉兒今次一改形象確實狂野,令人大開眼界,就要睇下出到來效果可唔可以說服觀眾。電影將於11月22日上映。