韓國女星朴信惠早於11歲簽約Dream Factory娛樂，與現年51歲嘅知名男歌手李承煥同屬一間事務所，期後朴信惠於2003年擔任李承煥嘅歌曲《花》MV女主角而出道，雖然朴信惠當時年紀輕輕，但演技已經好好，令觀眾印象深刻，以致朴信惠同年拍攝《天國的階梯》時爆紅，更獲頒當年嘅童星獎。

雖然朴信惠於2011年轉投依家所屬嘅S.A.L.T.娛樂，不過朴信惠一直視李承煥為恩師，噚晚李承煥喺首爾奧林匹克公園舉行演唱會，朴信惠亦特地抽空去撐場，並於Instagram上載兩人嘅合照。朴信惠留言寫道「公演的神」、「無敵李承煥」等字眼大讚對方，又扮花賣萌表示自己要求合照時，李承煥竟大感驚訝反問點解，搞到佢勁唔開心地表示：「叔叔你唔想同我影相？」，加上多個「唔開心」嘅表情符號，隔空向對方撒嬌。

更多韓流，喺晒《娛果》
http://fb.com/appledailyent