澳洲秋季嘉年華賽期進行得如火如荼，唔少在港之澳洲騎師都返去祖家獻技，但羅理雅就推咗唔少邀請，選擇全程留喺香港，全力爭取成績，而且想多啲時間陪屋企人。呢個星期，佢囝囝Campbell就趁學校放復活節假，日日陪老竇晨操，Campbell今季－直客串做埋爸爸嘅私人秘書，主動向一眾練馬師打交道，幫手mark低爸爸操咗邊幾隻馬，甚至連下期有哪些暫定座騎都知得一清二楚，醒目又幫到手。
Campbell暫只得5呎左右，絕對係騎師身材，但會唔會好似羅理雅咁將來做騎師，仲係未知數，不過兩父子就有共同嗜好，就係鍾意釣魚。剛周五佢哋入西貢，Campbell話西貢碼頭一帶好容易就有墨魚上釣，次次去都有斬獲。
羅理雅未嚟香港發展前，成日喺澳洲悉尼出海釣大魚，仲考埋船牌買咗架小艇，不過有一日隻艇竟被賊仔偷咗，激到羅理雅生蝦咁跳。佢話嚟咗香港咁耐，熟晒呢度啲釣魚熱點，好珍惜同囝囝相處嘅時間，因為Campbell呢個月29號就15歲生日，年齡越大總會有獨立時候。