短跑唔係英國強項，不過上年里約奧運英國女子接力隊就有好表現，喺4x100米接力項目拎到銅牌，32年嚟首次喺呢項賽事贏到獎牌。艾莎菲臘絲、迪絲莉亨利、甸娜史密芙同埋妮亞達會喺8月田徑世錦賽再合作爭取佳績，賽前先搞下宣傳，齊齊油到全身都係紅白藍油彩壯下聲威先。

現年只係20歲嘅妮亞達，啱啱喺上星期拎到達標成績，100米跑出11秒20，可以參加8月初喺倫敦舉行嘅世錦賽。佢話佢嘅目標係要喺2020年東京奧運再攞牌。