無綫劇《誰家灶頭無煙火》會頂替《依家有喜》播出，《誰》劇正趕拍，大肚婆姚瑩瑩都會參與，噚日瑩瑩陀住五個月大BB喺電視城開鏡拜神，開心大肚婆健步如飛，提起肚裏BB嘅事就笑不攏嘴，佢話：「唔做嘢真係好悶，唔做嘢會亂諗嘢，抑鬱都係咁樣形成，出嚟開工幾好，又有人同你傾吓偈，不過佢哋成日叫我唔好行咁快。有日拍場戲話我要急步追人，拍嗰時佢哋仲驚過我，成日叫我唔好咁急！」瑩瑩為咗專心生仔，會生完BB先再考慮同圈外男友搞婚禮，佢話：「要陀住個B又要搞結婚會太忙，都係生咗先算，生之前媽咪會喺新加坡過嚟幫我打點吓，預產期係6月尾，我打算自然生，因為人一世物一世，我都想試吓有幾痛！」

龔嘉欣約會第三者

龔嘉欣第一次同男友鄧健泓過情人節，佢話：「今年係第一年同男友過，以前拍拖一係情人節前散，一係情人節就冇男友。」第一年同鄧健泓過情人節，驚唔驚大吉利是過唔到，佢話：「唔知呀！不過今日我哋都會有第三者，姚子羚冇男友，我諗住叫埋佢一齊嚟食飯，多啲人開心啲！冇辦法，同我一齊都要接受喇！」