特首梁振英仲有不足三星期就卸任，唔少人或者等咗呢日好耐，一眾「梁粉」當然依依不捨，由「梁粉」搞嘅齊心基金會今日下午舉辦「我和CY有個約會」，過百人出席同689講拜拜，當年押注喺CY身上嘅民建聯相當捧場，計有前主席譚耀宗、現任主席李慧琼、行會成員葉國謙、立法會議員劉國勳同柯創盛、區議員鄭泳舜等，其他出席者包括紀文鳳、林奮強、周融、高志森、鄧爾邦、劉炳章等。

齊心基金仲整咗本書叫做「這個特首不太冷」，封面相片係正在「調理農務」嘅689，入面仲有689嘅學生照、BB相，成長等、家庭照等。

前特首董建華喺書中話自己畀CY更嚴肅：「嚴肅有個好處，就是不講廢話，好多人誤會了梁先生，其實他做事深思熟慮，是個難得的好人」，阿董仲批評政府長期以來採取積極不干預政策，錯失機遇，帶來損害：「我認為，這是梁特首最大制肘。」

撐CY有功、獲羅致做中央政策組顧問嘅高靜芝就喺書中話梁振英唔係狼，話佢係謙謙君子，唔鬧人又唔黑面：「他一點也不狼，有時候，我們甚至恨不得他狼一些。」曾任CY競選辦主任兼行會成員羅范椒芬亦話梁特上場後有不少制肘，包括架床疊屋嘅諮詢架構、社會出現對人不對事嘅壞風氣等，一句講晒，唔關CY事。

好早到場嘅譚耀宗話冇咩話捨唔捨得CY嘅，因為對方會繼續留喺政協幫手，尊重佢唔選嘅決定。馬恩國就大讚CY任內盡力改善房屋問題。