上兩星期大慶出咗張通告,話哈爾濱攝氏零下32度好鬼凍,搞到office啲暖氣管爆裂,水浸一、二樓,對電腦同文件「造成廣泛破壞」,聽落好陰公!點知到咗第二日,大股東個仔兼公司主席趙宇、仲有CFO方秉權,分別用「郵遞」及「email」方式,發辭職信畀董事會,趙宇話為咗令公司「可更靈活地處理挑戰」,所以忍痛離開。而方秉權就仲搞笑,話原來舊年6月已經想閃人㗎喇,但被董事會同德勤扯住,叫佢check埋條數先,但𠵱家公司因為水浸,會計紀錄都已經「唔存在」,所以方秉權話自己「冇貢獻」,可以辭職咁話!果然係「有燈就有人、有mail就走人」!
前幾日趙宇的老豆、大股東趙傳文都辭埋職,理由係身體唔好。大慶現時只剩一個執董和一個獨立非執董,到底上市集資嗰10幾億去咗邊?公司仲點復牌?睇嚟又會成為一宗無頭公案了。