當年今日
關於我們

讀邊科 - 左丁山

蘋果日報 2009/07/11 00:00


高考放榜後,有幾位朋友問左丁山如何替子女選科。有此問者,當然唔係尖子或五科之中有兩三科A嘅啦,成績優異生都唔知幾識揀,梗係醫科、商科,藥劑之類,今年報紙訪問一位五A或六A狀元,狀元話要讀新聞系,睇到幾位資深新聞界朋友眼突,佢哋慨嘆讀新聞系有乜好?有何前途?試看劉志權與楊健興之例子,做記者無不心淡。不過咁,讀新聞系算係有夢想,為民仗義執言,揭發社會黑暗面,發揮輿論影響力,維護人民言論自由等等係吸引年青人入讀新聞系嘅主要因素,至於在香港做記者嘅現實情況如何,畢業之後先算啦。
問選邊個學系先至好嘅,梗係邊線學生啦,一A四E,一B三D之類。左丁山收到問題,邊度識答?呢日校友聚會,剛好坐在一位九九年畢業嘅電腦專家旁邊,順口問吓,估唔到電腦專家Y毫不猶豫咁答:「理科生,物理或數學A,其他四科攞E,申請電腦工程啦,唔難入㗎。我九六年入學就要一A兩B,九九年畢業適逢科網股興旺,我係天之驕子,千禧年後,科網爆破,我哋成為地底泥,我幾經辛苦,全憑讀書時功課多,project多,根基打得穩,先至可以爬番上嚟。但現在理科叻仔叻女冇人選讀電腦與IT㗎嘞,有一A四E嘅話,肯申請就有機會入讀,不妨碰一碰運氣。」
講成咁,都唔知真唔真。電腦Y又講:「唔係吹水㗎,我不時回校與教授飲酒,教授話因為少人申讀,收生標準大降,以前逼我哋交嘅功課與project,現在唔敢要求咁多喎,因為學生會在『教授評估』時,大肆批評,令教授難堪也!」此事甚為諷刺,香港啲大學引進美國作風,畀學生在學期尾評估教授嘅教學,表面上好民主,殊不知就因為咁,教授唔敢「肥」學生,畀分好鬆手,功課又唔敢畀得多!一位資深教授曾對左丁山講:「學生評估教授害苦了新進助理教授,續約升職條件之中有學生評估一項,佢哋邊敢得罪學生吖。我讀書時碰過不少『殺人王』,成班肥晒嘅教授,家邊個敢肥晒啲學生?」兼職教師咪敢囉,大編輯到大專教新聞採訪,畀分極手緊,上頭叫佢鬆少少,大編輯話:「我隨時可以唔教㗎!」