【一雙一對】楊怡謙謙婚後首過新年 章子怡繼女笑晒闔家歡樂
何祖光汪曼熙何國倫繼女溫碧霞胡諾言楊怡羅仲謙微博楊千嬅章子怡醒醒
今日大年初一,唔少人聚埋一齊感受賀年氣氛,見吓一班親友,今日微博亦有唔少藝人晒幸福,有啲貼全家福,有啲晒一雙一對,認真羨煞旁人!
先睇睇家庭組合……就大陸代表有章子怡,佢今日貼出一家四口合照,留言:「新年第一天,祝福朋友們幸福安康,闔家歡樂!」相中見繼女「小蘋果」汪曼熙同囡囡「醒醒」笑得好開心,眨吓眼,小醒醒大個咗好多喇。
至於,本地薑代表就有楊千嬅一家三口及胡諾言一家四口同大家拜年,大晒和服look,胡仔解釋細仔胡澔錕仲喺屋企瞓覺,所以張相先冇佢份!
另一本地薑代表仲有一向好溫柔嘅溫碧霞,佢就趁住過年成家去咗玩,寫道:「恭喜發財,恭賀大家新年紅紅火火,大吉大利,恭喜恭喜!」有老公何祖光同養子何國倫陪伴,呢位人妻認真夠晒幸福!!
此外,羅仲謙同楊怡新婚後第一個新年,今年佢哋ready好派利是,兩公婆先後喺微博放閃,羅仲謙喺微博貼出同楊怡拎住「羅」字利是合照,寫道:「祝各位新年快樂,橫財就手,福星高照!楊怡快啲幫手派利是。」楊怡亦喺微博po攬攬相祝大家雞籠入水。