著名眼科醫生林順潮旗下希瑪眼科（3309）認真架勢，公開招股獲得超額認購逾1,500倍，噚日掛牌更加係星光熠熠，新地主席郭炳聯、港鐵主席馬時亨、股評人陳永陸、「蘭桂坊之父」盛智文全部畀面到賀；但講到最吸睛，當然係林順潮位靚女太太李肖婷喇。
希瑪上市前已經獲新地同盛智文入股，郭、盛二人捧場都好合理，不過郭炳聯平日絕少踏足交易大堂，都算稀客。佢哋呢班財經猛人亦好識做唔搶fo，只係自己圍埋吹水影相。
主人翁林順潮全程就好似隻蝴蝶咁，喺唔同嘅嘉賓之間穿梭。等儀式做到七七八八，一班財金猛人嘉賓就好低調咁走人，順利將所有注意力留番畀林老闆。