當年今日
關於我們

【真係會成事?】重拍《大時代》一切接洽中 秋官:搵阿姐做女丁蟹

蘋果日報 2018/12/14 13:21

丁蟹大時代鄭少秋汪明荃

汪明荃同鄭少秋噚晚去咗灣仔欣賞粵劇團演出,台慶頒獎禮喺周日舉行,阿姐話暫時冇乜心水,不過都睇好喺馬來西亞同新加坡都攞咗獎嘅黃智雯同袁偉豪,之不過張衞健主演《大帥哥》嘅呼聲都好高,阿姐就話暫時未睇,唔能夠評價,但一定有返咁上下,始終咁耐冇返嚟拍劇,一定會有新鮮感,見到宣傳片覺得幾得意。張衞健日前開口話如果攞獎就會繼續拍,阿姐聞言話:「唔攞都要拍呀,唔好忘記香港嘅觀眾。」
唔知阿姐幾時又會拍劇呢?佢就話要睇啱劇本同配搭,秋官應該係最適合人選,阿姐叫大家問吓秋官。至於係咪一定要啱對手先成事?阿姐話:「唔係,不過o依家好少角色啱我做,做阿媽角色、成日鬧人做得太多,希望劇本特別啲,唔好重複。」秋官聽完就話:「有人搵我哋咩?搵咪做吓囉,都睇劇本。」講到可以合作做啲乜嘢好,秋官話:「梗係情侶,談咗咁多年愛情,經驗豐富。」
日前《大時代》丁蟹一家五口亮相開幕活動(新聞連結: https://bit.ly/2Ga3L4j ),經典畫面重現眼前,秋官好坦白話希望再度合作,一切都洽談中,佢仲拉埋阿姐落水:「叫阿姐做女丁蟹,男女丁蟹大鬥法,好有新鮮感,搵埋韋家輝,青雲就係我哋兩個生嘅仔,女呢就係周慧敏,係Liza帶返嚟,呃我娶咗佢,唔係我生嘅。」
除咗拍劇之外,阿姐同秋官都好支持粵劇,阿姐o依家籌備西九文化區戲曲中心開幕,秋官希望推動粵劇,但係o依家嘅體力已經應付唔到再演戲曲。秋官話嚟緊會拍攝網劇,但係簽咗保密協議,唔能夠透露太多,只能透露係時裝劇。
精選娛聞,喺晒《娛果》
http://fb.com/appledailyent
empty
攝影:卓寶花
empty
阿姐話睇好黃智雯同袁偉豪拎獎!
empty
祥嫂同夏蕙姨一向都好支持粵劇。
empty
秋官提議搵埋阿姐一齊拍《大時代》!