濠江賭壇奇女子再度出擊！華華噚日睇到土地註冊處最新資料，發現中環荊威廣場6樓全層寫字樓樓面，喺上個月俾一間叫樂景投資有限公司，用7,200萬元買咗，呢間公司嘅董事叫司徒玉蓮，跟活躍於澳門賭業女猛人司徒玉蓮同名同姓。
講開司徒玉蓮，佢近呢幾個月間唔中就有一單大買賣，而且乜都買咁。好似之前就用3,000萬元，買咗元朗逢吉鄉25個地段，位置接近新地（016）喺沙埔村個大項目；之前又向麗新發展（488）買咗深水埗翠峰28嘅舖位，成1.55億元㗎。
至於今次荊威呢層寫字樓，就係同玩具大王蔡志明個女蔡加怡旗下間公司買嘅。蔡加怡任主席的康健國際（3886）之前公佈過，喺2011年頭以興途投資有限公司名義用5,686萬元買番嚟，計落賬面賺1,514萬元。