成龍同林鳳嬌寶貝仔房祖名上年喺北京容留他人吸毒罪成，被判入獄6個月，今年2月刑滿獲釋。

32歲嘅祖名放返出嚟就去咗台北同阿媽生活，大忙人爸爸平日最多一年見個仔一次，但房祖名出獄半年，成龍竟去過台灣探仔3次，父子溝通明顯多咗。

當日房祖名入獄，成龍曾話過出冊都唔幫個仔，但成龍今日接受美聯社訪問就忽然改口，佢話會幫房祖名搵新戲演出：「我對自己說為何我會那麽固執？我要幫助我的兒子。」

成龍遲啲出碟，當中有一首歌仲搵囝囝做監製，實行父子檔：「應該有首歌我們會互唱對方，我會講很抱歉你年輕時我很忙。」

房祖名踎監日子寫咗好多劇本、歌曲同睇咗好多書，成龍笑言話坐監都算好事：「我應該創立監倉假期，迫一些有錢人，包括自己去坐監，這些年頭全部人都應該這樣做，生活實在太忙。」