四叔魅力真係非同凡響，每逢講完兩嘴港股後，個市就升，早前大市還在25000點水平，佢老人家話後市見二萬八，升浪隨即捲至，將恒指推至目標。前兩日大市由高位急瀉千多點，以為大調整在即，豈料四叔又出場，以「股神」式口脗強調「恒指在3萬點，有力，邊係股災！」真係一句頂一萬句，大市即時有反應彈升857點，重上27800水平，一掃過去兩日陰霾。
此款一講即起救市效果的魔力，亦可算是今浪港股「大時代」特色，亦係股壇有史以來僅見。無錯，以往一直有不少股海中人評論大市，但好似四叔這種以首富級數大談炒股心得，則堪稱前無古人！以前班富豪點會如此高調公開講自己炒股，講得最多咪又係勸人「打工有前途，要拼搏！」今時今日若你對投資一竅不通，你今生今世想打幾耐工都得咯。

分拆光證獲批

股海恢復氣氛，全體股份俱見異動，難得是不少細價股都跟隨大市節奏。另外，在目前形勢之下，股價出現爆頂走勢之股份升勢應有餘未盡，值得留意。
星俠所講是「大光燈」光大控股（165），其所控資產之一光大證券已獲批上市，受消息刺激，光控股價即突破52周高位29元，一度升至29.55元，後回順至28.80元收市。由於分拆光大證券可令光控進賬不少，故值得伺機買入，突破30元後可再上層樓，起碼可見36元。